Indiana (París, 1832) é a primeira novela que Amantine Aurore Dupin escribe baixo o pseudónimo de George Sand, onde denuncia as condicións de vida das mulleres casadas en Francia ao longo da primeira metade do século XIX.

A autora crea, con audacia, a personaxe de Indiana, unha fermosa rapaza crioula, arredada dos estereotipos, e, a través da súa historia, aborda temas tabú e inmorais naquel intre, coma o adulterio e o desexo feminino.

Á parte de cuestionar o modelo do matrimonio convencional e explorar os temas do amor, a liberdade e a emancipación feminina, George Sand ofrece un estudo da sociedade e os costumes da súa época, ademais de retratar o contexto histórico e político da convulsa Francia do momento, que combina cunha intriga sentimental. O seu estilo recorre a unha linguaxe poética na descrición das paisaxes e as emocións, ademais de dotar os personaxes de gran profundidade psicolóxica.

Amatine Aurore Dupin (París, 1804-Nohant, 1876) é coñecida literariamente polo pseudónimo de George Sand. Nacida no seo dunha familia liberal que vivía á marxe dos convencionalismos sociais, a temperá morte do pai levouna a vivir coa avoa na súa propiedade de Nohant (Centre-Val de Loire), que recibiría en herdanza. Aos dezaoito anos casou con Casimir Dudevant, con quen tivo dous fillos, pero el dilapida o seu patrimonio e non tarda en abandonalo, para instalarse en París, onde viviu co seu amante, Jules Sandeau, e mantivo múltiples relacións, intelectuais e amorosas, con persoeiros como Alfred de Musset e Frédéric Chopin. Malia que estaba considerada unha muller de vida licenciosa, reclamou o seu dereito a vivir como considerase e, desafiando as prohibicións da época, traballou na escrita, vestiu roupa masculina e implicouse no feminismo e na defensa da igualdade de dereitos de homes e mulleres. A súa obra componse de novelas, ensaios, artigos na prensa e pezas teatrais.