A guerra, omnipresente na historia desde Heródoto e Tucídides, foi reivindicada pola historiografía occidental do século XIX, que vía en Grecia e Roma o berce dun “modelo occidental” da guerra. Na actualidade, politólogos como Hanson, Luttwak e Huntington, asesores dos plans estratéxicos dos EE. UU., seguen defendendo este modelo.

Este libro analiza como se “racionaliza” a guerra, defendendo a existencia dunha vinculación íntima entre a estratexia militar, a democracia, a economía e o desenvolvemento da ciencia e a tecnoloxía, elementos todos eles que terían o seu nacemento na Grecia antiga e que posteriormente serían a columna vertebral do estado-nación.

A realidade foi moito máis complexa, porque a guerra vai unida á imposición de réximes políticos, permite consolidar a explotación económica e fomenta a hostilidade constante entre estados, elementos todos eles xa presentes na antigüidade clásica, que intentaría regular a guerra a través do dereito.

A partir da I Guerra Mundial, nace a guerra de materiais, que supón un incremento xigantesco da capacidade de destrución. Pero esta ocúltase construíndo a imaxe dunha “guerra hixiénica”, que nega o sufrimento real dos combatentes e da poboación civil, sobre todo dos nenos e as mulleres, que sofren un tipo de violencia bélica moi específico, tal como se pode ver no último capítulo do libro.

Neste libro analízase a “guerra vivida”, non só a pensada, na perspectiva que defendía Luciano de Samosata no século II da nosa era, cando dicía que o historiador debe ter a capacidade de dicir a verdade, querer contala e non facerlle as beiras aos poderosos.

José Carlos Bermejo Barrera é catedrático de Historia Antiga na Universidade de Santiago. Autor de trinta e seis libros publicados en galego, castelán e inglés, así como de numerosos artigos publicados en revistas especializadas de ámbito internacional.

As súas investigacións abranguen temas relacionados coa historia das relixións antigas e a súas mitoloxías, nos ámbitos grego e hispánico. Así como a filosofía e teoría da historia e das ciencias socias.

É autor dos seguintes libros en lingua galega: Psicoanálise do coñecemento histórico, 1982; O final da Historia. Ensaio de Historia teórica, 1986; Pensala Historia, 2000; O Valor da Arqueoloxía (con Mar Llinares García), Lóstrego, 2006; ¿Para que serve a Historia de Galicia?, Lóstrego, Santiago, 2007; Relixión e sociedade na Galicia Antiga, Lóstrego, 2008; Historias de como Galicia chegou a ser una terra baldía e o que lle pasou á humanidade, 2009; Os señores da mentira. Política e cultura en Galicia, 2012 e Contos para nenos un pouquiño modernos, 2013.

_____

Editorial: Laiovento 06-2025
Idioma: Galego
Páxinas: 204 
ENSAIO
GUERRACIVIL