• Unha mirada imprevisible: Afastándose da alta cultura convencional, Ferreiro Chao-Abella convértese nun observador irónico da realidade. Retrata unha Galicia ateigada de contrastes que moitas veces choca coa imaxe idealizada que se ten dela. 
• Temáticas costumistas: Os artigos xiran arredor de elementos da cultura popular e da cotidianidade galega moderna: churrascos, verbenas, festas, a mocidade e os coches vellos, ou prebostes galeguistas esquecidos pola rúa. 
• Influencia de Cunqueiro: O autor guíase polo espírito de Álvaro Cunqueiro, ollando o seu arredor cun profundo agarimo pero tamén co respecto xusto e moito humor. 

Fran Ferreiro Chao-Abella (A Coruña, 1984) comezou a publicar en prensa despois de que Jose Manuel Pereiro o vise, nunha tarde de trebón, baixar pola rúa da Torre feliz, despreocupado e totalmente enchoupado. Supuxo que alguén así tería algo interesante que dicir. Era verán de 2022 e xa o coñecía de lelo nas redes sociais. Pouco despois fichouno Santiago Jaureguizar para o Táboa Redonda, suplemento cultural de El Progreso, onde escribe un artigo cada quince días. Cun deles gañou en 2024 o premio xornalístico Manuel Reimóndez Portela: «No 2ºG hai un narcopiso», contido na súa primeira escolma editada por Morgante, País estático, tempos salvaxes.