Entra na literatura... ata a cociña

Editorial Galaxia publica Cociñando ao pé da letra, unha orixinal proposta, a medio camiño entre a literatura e a cociña, coordinado pola poeta Yolanda Castaño e a fotógrafa Andrea Costas. Un libro que demostra que todo pode ser cociñado. Un volume para, da man dalgúns dos nosos máis sobranceiros escritores, aprendermos pratos suxestivos. Un texto para saborear as palabras ben escritas en receitas contadas doutra maneira. Un libro, en definitiva, que repara no vencello estreito entre os verbos cociñar e escribir. En palabras de Yolanda Castaño: "Vinte e unha escritoras e escritores galegos, coa máxima diversidade en canto a sexo e xeración, xénero literario e ata zona xeográfica. Homes e mozas, rapaces, señoras, da aldea, na cidade, na costa, do interior. Son algunhas das máis representativas e puxantes voces das nosas letras actuais. Autoras de ensaio e de literatura dramática, narradores, poetas, cultivadores de literatura infantil e xuvenil. Unha variada riqueza a través de ollos multiplicados, a través de perspectivas o suficientemente plurais". Os escritores e escritoras que cociñaron para este libro foron Anxos Sumai, Helena Villar Janeiro, Celso F. Sanmartín, Carmen Blanco, Rosa Aneiros, Lupe Gómez, Fina Casalderrey, Xavier Rodríguez Baixeras, Marga do Val, Xabier P. Docampo, Xosé María Álvarez Cáccamo, Chus Pato, Xavier Castro, Xabier Cordal, Lucía Aldao, Marica Campo, Agustín Fernández Paz, Cándido Pazó, María Reimóndez, Antón Lopo e Manuel Lourenzo.

Andrea Costas Lago (Vigo 1978) é artista plástica e mestra de fotografía na escola viguesa de deseño Aula D. Desenvolve o seu labor artístico utilizando diversos medios como instalación, vídeo ou perform ance, aínda que é mais coñecida polo seu traballo como fotógrafa.

Yolanda Castaño. Santiago de Compostela, 1977) é poeta, filóloga, tradutora, videocreadora e unha premiada xestora cultural coa súa Residencia para Escritores/as na Coruña. Dende 2009 dirixe obradoiros de tradución poética, festivais e ciclos de poesía. Conta no seu haber con múltiples premios, entre os que destacan os Premios Nacionais da Crítica (1998 e 2022), Espiral Maior 2007, Ojo Crítico 2009, Fundación Novacaixagalicia, González-Garcés de Poesía, “Galega do Ano 2023”, o Premio da Cultura de Galicia e o Premio Nacional de Poesía 2023.

Publicou varios poemarios individuais, edicións bilingües (galego-castelán) e en inglés, francés, cata- lán, italiano, serbio, macedonio, esloveno e armenio, plaquettes noutros tantos idiomas, antoloxías e libros de poesía infantil, entre outras moitas obras.

Recibiu varias bolsas como Escritora en Residencia no estranxeiro, mostrou o seu traballo en múltiples países e, en colaboración con outros/as artistas, desenvolveu experiencias que fusionan a escrita con outras linguaxes creativas: plástica, música, arquitectura, danza, audiovisual, cómic, cine en 360o ou mesmo coa cociña.

Na Editorial Galaxia publicou títulos para público infantil como Cando eu saiba ler, ilustrado por Xosé Tomás; Punver, e Punver de volta, ilustrados por Eduardo Hermida. En 2011 publicou xunto con Andrea Costas, Cociñando ao pé da letra.

____

Editorial: Galaxia 05-2011
Idioma: Galego
Páxinas: 184
Col: Cociña